Íþróttafélag Reykjavíkur

Þau ánægjulegu tíðindi getum við nú flutt að Guðrún Ósk Tryggvadóttir ritaði nú nýverið undir þriggja ára samning við ÍR.
Guðrún er þrátt fyrir að verða aðeins 27 ára gömul á þessu ári mikill reynslubolti hjá uppeldisfélagi sínu, hún lék fyrstu leiki sína 16 ára gömul og hefur í dag alls leikið 159 leiki í deild og bikar fyrir ÍR og skorað í þeim 13 mörk.
Margrét Sveinsdóttir þjálfari var kampakát við undirritunina. “Allir ÍR-ingar vita fyrir hvað Guðrún stendur, hún leggur sig alltaf meira en 100% fram fyrir félagið og skilur allt eftir á vellinum. Hún hefur leikið ólíkar stöður í gegnum sinn feril enda getur hún leyst ólík hlutverk. Við sjáum hana sem lykilmanneskju hjá okkur í sumar og til framtíðar enda fengið að spila með mér í gegnum tíðina og pottþétt lært mikið af því” sagði Magga brosandi.
Formaðurinn skrifaði glaður undir!
“Guðrún er svo sannarlega með stórt hvítblátt hjarta og hefur gengið með félaginu í gegnum súrt og sætt. Það skiptir okkur ótrúlega miklu máli að hafa hana með okkur áfram í liðinu, hún er mikil fyrirmynd fyrir okkar ungu stelpur og á svo sannarlega ennþá mikið að gefa, nú þegar hún fer að komast í 200 leikja klúbbinn bráðum. Frábærar fréttir!”
#hvítbláahjartað
X