Taekwondo maður og kona ÍR 2016 graphic

Taekwondo maður og kona ÍR 2016

21.12.2016 | höf: Jóhann Gíslason

Taekwondo kona ársins 2016 er Ibtisam El Bouazzati.

 

Þó að hún sé ung að árum þá hefur keppnisárangur hennar á árinu vakið verðskuldaða athygli, sérstaklega í ljósi þass að hún hefur lítið keppt fyrr en á árinu 2016.
Taekwondo hefur 2 keppnisgreinar, Bardaga og Form, en í Formi er keppandinn einn á gólfinu og sýnir fyrirfram ákveðnar æfingar.
Fyrsta mótið sem Ibtisam keppti á á árinu var í Bikarmótaröð Taekwondosambandsins. Var það Bikarmót II. Á því móti keppti hún bara í bardaga og lenti þar í 3. sæti.
Á næsta móti sem hún keppti á, Bikarmóti III gerði hún umtalsvert betur og sigraði í Bardaga, var í 2. sæti í formi einstaklings og í 1. sæti í Formi para.
Einnig keppti hún á Íslandsmeistaramóti í Formi og lenti þar í 2. sæti í einstaklingskeppninni og í 3. sæti í Formi para.
Síðasta mót ársins var síðan Bikarmót I. Þar var hún í 2. sæti í bardaga. Í Formi keppti hún í 3 greinum, einstaklings, para og hópa, og lenti í öllum greinum í 3. sæti.
Einnig steig hún sín fyrstu spor með krakkalandsliðinum, bæði í Bardaga og Formi, og í dag æfir hún með landsliðinu í Formi. Sem sagt frábært ár hjá henni og framtíðin björt.

 

Taekwondo maður ársins 2016 er Sveinn Logi Birgisson.

 

Sveinn hefur keppt á nokkrum mótum áður, en það var á árinu 2016 sem að hann fór fyrst virkilega að skila verðlaunum í hús.
Fyrsta mót ársins var Bikarmót II. Þar gerði hann sér lítið fyrir og náði í sitt fyrsta gull í Bardaga með því að vinna þann hluta mótsins. Einnig keppti hann í Formi en lenti rétt utan verðlaunasætis í 4. sæti.
Næsta mót var Íslandsmeistaramótið í Bardaga og þar endaði hann sem Íslandsmeistari.
Á næsta móti sem var Bikarmót III, hélt Sveinn sigurgöngunni í bardaga áfram og náði 1. sæti í Bardaga og einnig náði hann núna 3. sæti í Formi.
Næst keppti hann á Íslandsmeistaramótinu í Formi og var þar hársbreidd frá öðrum Íslandsmeistaratitilinum á árinu með því að ná 2. sæti í Formi.
Síðasta mót ársins var síðan Bikarmót III. Þar keppti hann bara í bardaga og fullkomnaði árangur ársins með því að vera einnig í 1. sæti á því móti, og vann því gull í bardaga á öllum mótum ársins og tapaði ekki einum bardaga í þessum 4 mótum sem er glæsilegur árangur.
Sveinn hóf einnig ferilinn með krakkalandsliðinu í Bardaga á árinu og ljóst að hann er bara rétt að byrja enda ungur að árum.